socha nahin acha bura dekha suna kuch bhi nahin

socha nahin acha bura dekha suna kuch bhi nahin

manga Khuda se raat din tere siwa kuch bhi nahin

dekha tujhay socha tujhay chaha tujhay pooja tujhay

meri khata meri wafa, teri khata kuch bhi nahin

jis per hamari ankh ne moti bichaaye raat bher

bheja usay wohi kaghaz us per likha kuch bhi nahin

ik shaam ki dehleez per bethay rahay woh der tak

ankhon se ki batain, monh se kaha kuch bhi nahin

do char din ki baat hai dill khaak main so jaye ga

jab aag per kaghaz rakha baqi bacha kuch bhi nahin

ehsaan ki khushboo kahan, awaz k JuGnO kahan

khamosh yadon k siwa gher main raha kuch bhi nahin

Jab Tere Dard Mein Dil Dukhta Tha

Jab Tere Dard Mein Dil Dukhta Tha
Hum Tere Haq Mein Duyaien karte The

Jab teri Dhun mein Jiya Karte The
Hum Bhi Chup Chaap Phira Karte The

Aankh Mein Pyas Huwa kartie Thie
Dil Say Toofan Utha Karte The

Log Aate The Ghazal Sunne ko
Hum Teri Baat Kiya Karte The

Such Samajhte the tere waadoun ko
Raat Din Gher Mein Chupa Karte The

Kisi Weerane Mein Tujh Say Mil Kar
Dil Mein Kya Phool Khila Karte The

Gher Ki Dewaaroun Ko Sajane Ke liye
Hum Tera Naam Likha Karte The

Woh Bhi Kya Din The Bhula Kar Tujh Ko
Hum Tujhe Yaad Kiya Karte The

Jab Tere Dard Mein Dil Dukhta Tha
Hum Tere Haq Mein Duyaien karte The

Bujhne Lagta Tha jo Tera Chehra
Dagh Seene Mein Jala Karte The

Chherta Tha Gham-e-Duniya Mohsin
Hum Tere Gham Say Gila Karte The

Jis Simat Bhi Dekhoon Nazer Atta Hai Kay Tum Ho

Jis Simat Bhi Dekhoon Nazer Atta Hai Kay Tum Ho
Aai Jan-e-Jahaan Yeh Koi Tum Sa Hai Kay Tum Ho

Yeh Khawaab Hai, Khushboo Hai Kay Jhonka Hai Kay pal Hai
Yeh Dhund Hai Badal Hai Kay Saya Hai Kay Tum Ho

Is Deed Ki Saait Hai Kaye Rang Hain Lerzaa’n
Mai Hon Kay Koi Orr Hai Dunyaa Hai Kay Tum Ho

Dekho Yeh Kisi Orr Ki Ankhain Hain Kay Meri
Dekho Yeh Kisi Orr Ka Chehra Hai Kay Tum Ho

Yeh Umer-e-Guraizaa’n Kaheen Thairay Tu Yeh Janoo’n
Her Ik Saans Mai Mujh Ko Yehi Lagta Hai Kay Tum Ho

Ik Dard Ka Phaila Howa Sehra Hai Kay Mai Hoon
Ik Mouj Mai Ayaa Howa Daryaa Hai Kay Tum Ho

Wo Waqat Naa Aai Kay Dil-e-Zaar Bhi Sochay
Is Sheher Mai Tanhaa Koi Hum Sa Hai Kay Tum Ho

Abaad Hum Aashufta Sirroo’n Se Nahi Maqtil
Yeh Rasum Bhi Is Sheher Mai Zindda Hai Kay Tum Ho

Aai Jan-e-Faraz Itni Bhi Toufeeq Kisay Thi
Hum Ko Gham-e-Hasti Bhi Gawaara Hai Kay Tum Ho